१४ वैशाख,धनगढी। कञ्चनपुरको शुक्लाफाँटा राष्ट्रिय निकुञ्जको करिब ९ सय बिघा जग्गा भारतीयले अतिक्रमण गरेर भोगचलन गरिरहेको तथ्यबारे सरकार मौन र बेखबर पाइएको छ । बेल्डाँडी गाउँपालिका–५ को नजिकै पर्ने शुक्लाफाँटा राष्ट्रिय निकुञ्जको क्षेत्राधिकारभित्र पर्ने करीब ९ सय बिघा जग्गा भारतीयले अतिक्रमण गरी भोगचलन गर्दै आएको कुरामा सरकार अहिले सम्म मौन देखिएको हो ।
३ पुसमा कञ्चनपुरका प्रमुख जिल्ला अधिकारी नारायणप्रसाद सापकोटा, जिल्लास्थित नेपाली सेना, सशस्त्र प्रहरी बल, नेपाल प्रहरीका प्रमुख र शुक्लाफाँटा राष्ट्रिय निकुञ्जका प्रमुख संरक्षण अधिकृत मनोज शाहसहितले उक्त क्षेत्रमा स्थलगत निरीक्षण र अध्ययन गरी सरकारलाई पत्राचार समेत गरिसक्दा पनि आफ्नो जमीन फिर्ता लिन हालसम्म कुनै पहल गरिएको छैन।
साविकको २७ र २८ नम्बर पिल्लर अर्थात् हालको ७८७ र ७८८ नम्बर सीमा स्तम्भको बीचमा पर्ने निकुञ्ज क्षेत्रको जग्गा अतिक्रमण गरेर भारतीय पक्षले भोगचलन गर्दै आएका छन्।
