भृकुटी न्यूज: शनिबार साहित्यमा स्रष्टाको तस्बिर 

स्रष्टाको वास्तविक नाम: हिरण्य श्रेष्ठ 

साहित्यिक नाम: हिरण्य भोजपुरे 

संक्षिप्त परिचय: नेपाली साहित्य र संगीत क्षेत्रका प्रसिद्ध एवं बहुप्रतिभाशाली स्रष्टा हिरण्य भोजपुरेको जन्म वि.सं. १९९९ साल मंसिर १२ गते भोजपुर जिल्लाको देउरालीमा भएको हो। उहाँको वास्तविक नाम हिरण्य श्रेष्ठ भएपनि नेपाली साहित्य र संगीतमा हिरण्य भोजपुरे नामले चिनिनु हुन्छ। उहाँको व्यक्तित्वका मुख्य पक्षहरूमा सरलता, सिर्जनशीलता, सामाजिक चेतना र बहुआयामिक प्रतिभा पर्छन् । उहाँ लेकाली साङ्गीतिक समूहका संस्थापक सदस्य मध्येका एक हुनुहुन्छ , जसले नेपाली लोक तथा आधुनिक संगीतको विकासमा ठूलो योगदान पुर्‍याएको छ । उहाँका कृतिहरूमा कथा, उपन्यास, लघुकथा, बालसाहित्य लगायतका विधा पर्छन्। उहाँका उपन्यासमध्ये ‘छिटेन गोरी’ र ‘मेरी आमै, मेरी आमा’ विशेष उल्लेखनीय छन्। लघुकथासंग्रह ‘मुसुक्क म’ मा १०८ वटा लघुकथा समावेश छन्, जसले जीवनका साना तर रोचक पक्षहरूलाई सरल ढङ्गले देखाएको छ। उहाँले बालबालिकाका लागि पनि लेखन गर्नुभएको छ। उहाँका रचनामा मानविय संवेदना, सामाजिक परिवेश, जीवनका अनुभव र मनोरञ्जनात्मक अभिव्यक्ति पाइन्छ।

प्रसिद्ध स्रष्टा हिरण्य भोजपुरे नेपाली गीत–सङ्गीतका क्षेत्रमा महत्वपूर्ण योगदान पुर्‍याउने स्रष्टा तथा, गीतकार, संगीतकार र गायकका रूपमा चिनिनुहुन्छ। उहाँले लोकधुनलाई आधुनिक शैलीमा ढालेर नेपाली गीतलाई नयाँ पहिचान दिनुभयो। उहाँका गीतहरू प्रायः राष्ट्रिय भावना, सामाजिक चेतना र प्रकृतिप्रेममा केन्द्रित छन्। उहाँका चर्चित गीतहरूमा ‘मलाई प्यारो लाग्छ’, ‘झाँक्री गीत’, ‘हर हर महादेव’, ‘बस बस रे’, ‘ट्याम्के डाँडा’, ‘हुस्सुले छोपेको सहरमा’ लगायत पर्छन्। यी गीतहरूमा उहाँले आफैं शब्द र संगीत मात्र होइन, धेरै गीत आफैं गाउनुभएको छ। उहाँका गीतहरू नेपाली लोकधुन, राष्ट्रियता, सामाजिक यथार्थ, र मानविय संवेदनालाई जोडिदै लेखिएका हुन्छन्। उहाँको संगीतको योगदान मनोरञ्जनमा मात्र सीमित नभई, नेपाली समाजमा चेतना र मौलिकताको सन्देश प्रवाह गर्न उल्लेखनीय रहेको छ । हिरण्य भोजपुरेलाई नेपाली संगीत आकाशमा विशिष्ट स्थान राख्ने स्रष्टाका रूपमा सम्मानका साथ लिइन्छ। यस्ता अग्रज स्रष्टाप्रति उच्च सम्मान गर्दै “भृकुटी न्यूज: शनिबार साहित्यमा स्रष्टाको तस्बिर ” श्रृङ्खलामा उहाँलाई प्रस्तुत गरेका छौं । आदरणीय अग्रज स्रष्टा हिरण्य भोजपुरेको सुस्वास्थ्य एवं दीर्घ जीवनको कामना सहित हार्दिक बधाई ज्ञापन गर्दछौं ।

भृकुटी न्यूज 

साहित्य कला विभाग 

काठमाडौँ ।