भृकुटी न्यूज: शनिबार साहित्यमा आजको पुस्तक
लेखक : अभागी थेगुवा
पुस्तक : सपनाहरूको बही
विधा: कविता
प्रकाशक: स्रष्टा पब्लिकेशन
पृष्ठ सङ्ख्या: १२६
मूल्य: ४५० ( हार्ड कभर )
आईएसबीएन: 9789937188197

स्रष्टाको संक्षिप्त परिचय:
नेपाली साहित्यको समकालीन धारामा आफ्ना ओजिला र सुगठित रचनामार्फत पृथक् पहिचान बनाउन सफल प्रतिभाशाली स्रष्टा हुनुहुन्छ— अभागी थेगुवा (मनबहादुर लिम्बू)। वि.सं. २०३० साल पुस १० गते पूर्वको पहाडी जिल्ला तेह्रथुमको उम्फुवामा पिता दुर्गबहादुर लिम्बू र माता दुर्गामाया लिम्बूका सुपुत्रका रूपमा उहाँको जन्म भएको हो। स्थायी रूपमा कमल–३, झापा निवासी उहाँ हाल अर्जुनधारा–११, झापालाई आफ्नो कर्मथलो बनाई साहित्यिक र शैक्षिक यात्रामा निरन्तर क्रियाशील हुनुहुन्छ।
शिक्षामा स्नातक तहसम्मको औपचारिक अध्ययन पूरा गर्नुभएका थेगुवा पेसाले शिक्षण कर्ममा आबद्ध हुनुहुन्छ। अर्जुनधारा–११ स्थित महारानीगञ्ज माध्यमिक विद्यालयको प्रधानाध्यापकका रूपमा उहाँले शैक्षिक नेतृत्व प्रदान गर्दै समाजलाई ज्ञानको उज्यालो बाँडिरहनुभएको छ।
वि.सं. २०४७ सालमा मुक्तक प्रकाशनमार्फत साहित्यिक यात्राको औपचारिक श्रीगणेश गर्नुभएका थेगुवाले कविता र गजलका विविध आयामहरूमा आफ्नो सशक्त उपस्थिति जनाउनुभएको छ। उहाँका प्रकाशित कृतिहरूमा ‘सप्तकोशीको किनारबाट’ (संयुक्त गजल सङ्ग्रह, २०५४), ‘बुद्धले अस्त्र…’ (कविता सङ्ग्रह, २०५८), ‘हर्के, म अनि युद्ध’ (गजलकाव्य, २०६७) र ‘सपनाहरूको बहि’ (कविता सङ्ग्रह, २०८१) रहेका छन्। उहाँका रचनाहरूमा समाजको यथार्थ, युगिन चेतना र मानवीय संवेदनाको सूक्ष्म अभिव्यक्ति पाइन्छ।
सिर्जनात्मक लेखनका साथै उहाँले सम्पादनका माध्यमबाट पनि नेपाली साहित्यको श्रीवृद्धिमा महत्त्वपूर्ण योगदान पुर्‍याउनुभएको छ। उहाँले धरानबाट प्रकाशित हुने साहित्यिक दैमासिक ‘गुम्बज’ (२०५४), झापाबाट प्रकाशित साहित्यिक मासिक ‘त्रिवेणी’ (२०५७) र समसामयिक साहित्यिक पत्रिका ‘नवरङ्ग’ (अङ्क १ र २, २०५८) को कुशल सम्पादन गर्नुभएको छ।
शिक्षा र साहित्यको क्षेत्रमा पुर्‍याउनुभएको विशिष्ट योगदानको कदर गर्दै उहाँ विभिन्न ८/९ भन्दा बढी सङ्घसंस्थाबाट सम्मानित तथा प्रशंसित भइसक्नुभएको छ।

शिक्षणजस्तो पवित्र पेसा र साहित्यजस्तो गहन साधनालाई सँगसँगै अघि बढाइरहनुभएका अभागी थेगुवा नेपाली साहित्य आकाशका एक समर्पित र आदरणीय व्यक्तित्व हुनुहुन्छ यस्ता मुर्धन्य स्रष्टा कवि, साहित्यकार अभागी थेगुवाका आगामी सिर्जनाहरूले नेपाली साहित्यलाई अझ उच्च शिखरमा पुर्‍याउन सकोस भन्ने शुभकामना सहित “भृकुटी न्यूज: शनिबार साहित्यमा आजको पुस्तक” श्रृङ्खलामा उहाँको कविता संग्रह ‘ सपनाहरूको बही ’ समावेश गरेका छौँ । स्रष्टा थेगुवाको सुस्वास्थ्य र दीर्घ जीवनको कामना सहित निरन्तर साहित्यिक यात्राको हार्दिक मङ्गलमय शुभकामना व्यक्त गर्दछौ।

भृकुटी न्यूज
साहित्य,कला विभाग 
काठमाडौँ ।