विराटनगर — नेपाली कांग्रेसको १५ औँ महाधिवेशन नजिकिँदै गर्दा मोरङ निर्वाचन क्षेत्र नम्बर २ मा पार्टीभित्रको आन्तरिक प्रतिस्पर्धा निकै रोचक र पेचिलो बनेको छ। १० जना केन्द्रीय महाधिवेशन प्रतिनिधि (खुल्ला) पदका लागि २५ जनाले उम्मेदवारी दर्ता गराएपछि पार्टी भित्रको  चुनावी सरगर्मी ह्वात्तै बढेको हो।
यसपटकको महाधिवेशन प्रतिनिधि छनोटमा पूर्वमन्त्री एवं प्रभावशाली नेता डा. मिनेन्द्र रिजालदेखि स्थानिय युवा नेता होमराज थापासम्मका नेताहरू चुनावी मैदानमा हुनुहुन्छ । तर, चुनावी भिडन्त सोचेजस्तो सहज भने छैन। स्थानीयस्तरमा पकड बनाएका र जुझारु युवा नेताहरूले निर्भिकताका साथ प्रतिस्पर्धामा उत्रने हिम्मत गरेपछि शीर्ष र सिनियर नेताहरूलाई महाधिवेशन प्रतिनिधि बन्न निकै सकस परिरहेको छ।
पार्टीभित्रका विभिन्न जिम्मेवारी र भूमिकाहरूमा केन्द्रीय नेताहरू चुकेको आरोप लगाउँदै स्थानीय कार्यकर्ता र युवा पंक्तिमा उनीहरूलाई रोक्नुपर्ने लहर चलेको छ। शीर्ष नेतृत्वको कार्यशैलीप्रति असन्तुष्ट बनेका स्थानीय कार्यकर्ताको झुकाव युवाहरूतर्फ देखिएपछि सिनियर नेताहरू थप अप्ठ्यारोमा परेका छन्।
यसैक्रममा केन्द्रीय महाधिवेशन प्रतिनिधि (खुल्ला) तर्फका उम्मेदवार, मोरङ पथरीशनिश्चरे-५ हसन्दहका कांग्रेस युवा नेता एवं समाजसेवी होमराज थापाले पार्टी रूपान्तरणका लागि आफ्नो उम्मेदवारी रहेको स्पष्ट पार्नुभएको छ।
“नेतृत्वका कारण पार्टी बिग्रियो भनेर बाहिर बसेर गाली गर्नुभन्दा पार्टीलाई सही बाटोमा ल्याउन, सुधार्न र रूपान्तरण गर्न सही समयमा कम्मर कस्नु युवाको कर्तव्य हो,” नेता थापाले भन्नुभयो, “त्यही जिम्मेवारी बोध गरेर म यसपटक महाधिवेशन प्रतिनिधिको मैदानमा उत्रिएको हुँ।”
केन्द्रीय नेताहरूको अनुभव र युवाहरूको परिवर्तनको एजेन्डाबीच मोरङ-२ मा हुन गइरहेको यो प्रतिस्पर्धालाई कांग्रेस वृत्तमा निकै चासोका साथ हेरिएको छ।