२८ कार्तिक काठमाडौ,
लेखक चिन्तक विष्णु ओलीद्वारा लिखित पुस्तक `ब्युँझेको कुम्भकर्ण´ को एक भव्य कार्यक्रमका साथ विमोचन गरिएको छ।
पछिल्लो नेपालको आर्थिक,सामाजिक,सांस्कृतिक एवम राजनीतिक लगायतका समग्र राष्ट्रिय विषयवस्तुमाथि विचार विमर्श सहित समग्र विश्लेषण गरिएको उक्त पुस्तकमा नेपाली समाजको आजको मनोविज्ञान र सचेत जागरणलाई प्रष्टपार्न खोजिएको समालोचकहरुले टिप्पणी गरेका छन् । राजनीतिक विश्लेषक इतिहासकार प्रा.डा.सुरेन्द्र केसीको प्रमुख आतिथ्यमा सम्पन्न कार्यक्रममा साहित्यकार डा.तुलसी भट्टराई ,विष्णु बिभु घिमिरे लगायत महानुभावहरुको विशेष आतिथ्यता रहेको थियो ।बानेश्वर बहुमुखी क्याम्पसको हलमा सम्पन्न
कार्यक्रमका वक्ताहरूले पुस्तकको सन्दर्भमा चर्चा गर्नुभएको थियो भने प्रमुख आतिथ्यताको आसनबाट बोल्दै डा केसीले आजको समाज, राजनीति, प्रवृत्ति र पुस्तकको औचित्यबारे उल्लेख गर्नुभएको थियो । गलत राजनीतिले उत्पन्न प्रवृत्ति उपर कलम चलाउन सहज नभए पनि लेखकहरुले सहास गर्नु पर्ने भन्दै डा.केसीले बौद्धिक वर्गले सही भूमिका खेल्न नसकिरहेको अवस्थामा विष्णु ओलीको `ब्युँझिएको कुम्भकर्ण´सबै गलत भूमिकाहरु विरुद्ध एउटा बौद्धिक थप्पडको रुपमा देखापरेको उल्लेख गर्नुभएको थियो ।
