भृकुटी न्यूज: शनिबार साहित्यमा आजको पुस्तक
पुस्तक: ‘टुङ्गना ‘
लेखक/ कवि: अमर आकाश
विधा: कविता
प्रकाशक: ह्वाइट लोटस
कवि आकाशको संक्षिप्त परिचय: चितवनको भरतपुर अस्पतालमा जन्मिएर काठमाडौंमा बाल्यकाल र युवाकाल बिताउनु भएका युवा कवि अमर आकाश नेपाली कविता साहित्यमा मौलिक पहिचान बनाउन सफल एक हस्ताक्षर हुनुहुन्छ । विश्व चलचित्रको समेत राम्रो अध्येता अमरले केही वर्षयता नियमित रुपमा राष्ट्रिय साहित्यिक मासिक ‘मधुपर्क’मा चलचित्र समीक्षा गर्दै आउनु भएको छ। यसबाहेक उहाँ पुस्तकहरूको समालोचनामा समेत सक्रिय हुनुहुन्छ। राष्ट्रिय तथा अन्तर्राष्ट्रिय सञ्चार माध्यमहरूमा नियमित रूपमा प्रकाशन भइरहने उहाँका समालोचनाहरूले कृतिहरू माथिको गहिरो अनुसन्धानमा ठूलो टेवा पुर्याउँदै आएको छ भने
राष्ट्रिय तथा अन्तर्राष्ट्रिय साहित्यिक सङ्ग्रहहरू अङ्ग्रेजी, जर्मनेली,हिन्दी लगायत भाषाहरुमा उहाँका कविताहरू समेटिएका छन् । सन् २०२४ मा केरला साहित्य अकादमीले आयोजना गरेको इन्टरनेसनल लिटरेचर फेस्टिभलमा समेत नेपालको प्रतिनिधित्व गर्दै भाग लिनभएका अमर कथा लेखनमा पनि सक्रिय हुनुहुन्छ । उहाँका कथा प्रज्ञा प्रतिष्ठानबाट प्रकाशित समकालीनमा पनि छापिएका छन् । हाल उहाँ कथा संग्रह तथा उपन्यास समेत प्रकाशनको तयारीमा रहनुभएको छ ।
साहित्य साधनालाई जीवनको परम ध्येय मान्ने कवि अमर आकाशका आगामी सिर्जनाहरूले नेपाली साहित्यलाई अझ उच्च शिखरमा पुर्याउन सकोस भन्ने शुभकामना सहित “भृकुटी न्यूज: शनिबार साहित्यमा आजको पुस्तक” श्रृङ्खलामा उहाँको कविता संग्रह ‘टुङ्गना’ समावेश गरेका छौँ । स्रष्टा आकासको सुस्वास्थ्य र दीर्घ जीवनको कामना सहित निरन्तर साहित्यिक यात्राको हार्दिक मङ्गलमय शुभकामना व्यक्त गर्दछौ।
भृकुटी न्यूज
साहित्य कला विभाग
काठमाडौँ ।