२२ श्रावण, भृकुटी न्यूज, काठमाडौँ। सुनसरीको देवानगञ्ज गाउँपालिका–३, कप्तानगञ्जमा भएको हिंसात्मक घटनाको सत्यतथ्य छानबिन र पीडितलाई न्यायको माग गर्दै राष्ट्रिय एकता दलका अध्यक्ष विनय यादवले माइतीघर मण्डलामा सुरु गरेको आमरण अनशन आज नवौँ दिनमा प्रवेश गरेको छ।
अधिकार र न्यायका लागि लगातार अनशनमा बसेका अध्यक्ष यादवको स्वास्थ्य अवस्था दिनानुदिन नाजुक बन्दै गएको उपचारमा संलग्न चिकित्सकहरूले बताएका छन्। लगातारको अनशनका कारण उनको शरीरमा ऊर्जाको कमी भई जटिलता देखिन थालेको छ।
यसैबिच, मण्डलामा जारी अनशन र देवानगञ्ज घटनाको मुद्दाले अब संसद्मा पनि प्रवेश पाएको छ। प्रतिनिधिसभा बैठकमा बोल्दै सांसद खुस्बु ओलीले अध्यक्ष यादवको खस्कँदो स्वास्थ्यप्रति चिन्ता व्यक्त गर्दै उनका माग र घटनाको निष्पक्ष अनुसन्धानका लागि सरकारको गम्भीर ध्यानाकर्षण गराएकी छन्। उनले अविलम्ब वार्ता टोली गठन गरी यादवको जीवन रक्षा गर्न र पीडितलाई न्याय दिलाउन सरकारसँग जोडदार माग गरिन्।
पीडित परिवारलाई न्याय नमिलेसम्म र घटनाको सत्यतथ्य छानबिन गर्ने प्रतिबद्धता नआएसम्म अनशन जारी रहने राष्ट्रिय एकता दलले जनाएको छ।