काठमाडौँ: शुभकामना स्कुलमा आयोजित रोबोटिक्स, स्टीम (STEAM) तथा आर्टिफिसियल इन्टेलिजेन्स (एआई) प्रदर्शनी सम्पन्न भएको छ। करिब एक दर्जनभन्दा बढी विभिन्न यान्त्रिक नमुनाहरू (मोडल) तथा अन्य विषयका प्रयोगात्मक सिकाइसम्बन्धी आकर्षक प्रस्तुतिहरू राखिएको उक्त प्रदर्शनीमा विद्यार्थी, अभिभावक, शिक्षक-शिक्षिका, कर्मचारीका साथै अन्य विद्यालयका विद्यार्थी र शिक्षकहरूको समेत बाक्लो उपस्थिति रहेको थियो।
प्रदर्शनीमा वाइफाइ कार (WiFi Car), ट्राफिक लाइट प्रणाली, रोबोट, पानी ट्याङ्कीको साइरन प्रणाली, विभिन्न खेल मेसिनहरू र सामान ओसारपसार गर्न सक्ने ड्रोन जस्ता उपकरणहरूले सबैको ध्यान आकर्षित गरेको थियो।
‘नेपा ट्रोनिक्स’ (Nepa Tronix) ले प्राविधिक सहयोग प्रदान गरेको उक्त कार्यक्रममा लायन्स क्लब अफ जोरपाटी, लियो क्लब अफ जोरपाटी, लायन्स क्लब अफ काठमाडौँ र समाज डेन्टल हस्पिटलको सहकार्यमा नि:शुल्क आँखा तथा दन्त शिविर समेत सञ्चालन गरिएको थियो।
कार्यक्रमका प्रमुख अतिथि गोकर्णेश्वर नगरपालिका वडा नं. ४ का अध्यक्ष श्री जयराम महतज्यूले उद्घाटन मन्तव्य राख्दै विद्यालयले साना बालबालिकाहरूलाई प्रविधि, सीप, खेल र मनोरञ्जनका साथै उत्कृष्ट शिक्षा प्रदान गरिरहेकोमा खुसी व्यक्त गर्नुभयो। उहाँले अभिभावक तथा विशिष्ट व्यक्तित्वहरूको उत्साहजनक उपस्थितिले कार्यक्रमलाई थप प्रेरणादायी बनाएको बताउनुभयो।
विद्यालय परिवारले प्रत्येक नमुना निर्माण र प्रस्तुतिमा कडा मेहनत गर्ने शिक्षकहरू, सहयोगी अभिभावकहरू र प्रतिभाशाली विद्यार्थीहरूप्रति हार्दिक आभार प्रकट गरेको छ।
यस्ता कार्यक्रमले नयाँ पुस्तामा चिन्तनशील, सिर्जनशील र आविष्कारक क्षमताको विकास गर्नुका साथै दयालु नेतृत्वकर्ता निर्माणमा महत्त्वपूर्ण योगदान पुर्याउने विश्वास विद्यालयले बताएको छ ।
शुभकामना विद्यालयले विद्यार्थीहरूको अन्तर्निहित क्षमताको पूर्ण विकासका लागि प्रविधिमा आधारित सिकाइ, परियोजनामूलक शिक्षण र अध्यात्मलाई जोडेर शिक्षा प्रदान गर्दै आएको जनाएको छ । विज्ञान, प्रविधि र आध्यात्मिकतालाई एकीकृत गर्दै दक्ष र जिम्मेवार नागरिक तयार पार्नु नै विद्यालयको मुख्य उद्देश्य रहेको विद्यालयका सञ्चालकको भनाइरहेको छ ।
