विचार फरक
सोच फरक
लक्ष्य र बाटो पनि अलग–अलग
एकै आकाश मुनि हिँड्दा पनि
प्रत्येक मनको चाहना फरक छ
कोही सपना बुनिरहेका छन् चन्द्रमासँग,
कोही
माटोमै खोज्दैछन् आनन्दको रङ ।
कोही बोल्छन्
हाँसोभित्र पीडा ,
कोही मौनतामा राख्छन्
भावनाको लहर ,
इच्छाको संकल्प ।
विचार  र बेदना
कसैको छ छिटो,
कसैको ढिलो  प्रहार छ ।
कसैले सानो कुरामा सन्तोष पाउँछ,
कसैले ठूलो जितमा ,
काम, इच्छा, सोच सबैको बेग्लै छ ।
संघर्ष,  फरक छ
सफलता फरक छ
यही विविधतामा छ
जीवनको रङ,
किनकि
कोहीजस्तो कोही हुँदैन  ।

अरूलाई
आफूजस्तो बनेन भनेर
गुनासो नगर्नु,
एक पाटो राम्रो छ
एक पाटो नराम्रो
प्रत्येक आत्मा
आफ्नो बाटोमा
उज्यालो खोज्दै छ
फरक भएरै संसार सुन्दर छ ।
ऊ जस्तो म हुँदिन
म जस्तो ऊ हुँदैन
कोही जस्तो कोही हुँदैन ।