भृकुटी न्यूज, नयाँ बजार इलाम।
माइ जोगमाई गाउँपालिका १ नयाँ बजार (प्रेमेजुङ्ग) अन्तर्गत ढुङ्गेल गाउँदेखि काब्राबोटे हुँदै स्कुल डाँडासम्मको ३ किलोमिटर सडक निर्माण कार्य सम्पन्न भएको छ। स्थानीयवासीको सक्रियता, चन्दा संकलन तथा जनश्रमदानबाट उक्त बाटो निर्माण गरिएको हो।
गाउँपालिकाले सडक खन्नका लागि डोजर उपलब्ध गराएपछि त्यसमा लाग्ने इन्धन (तेल) को खर्च स्थानीय जनताले नै जुटाएका थिए । सडक निर्माणका लागि विगत देखि नै महत्वपूर्ण भूमिका खेल्दै आएको स्थानीय ‘सान्भी हाइड्रोपावर’ ले थप ५०,००० रुपैयाँ सहयोग उपलब्ध गराएको थियो।
त्यस्तै, स्थानीयवासीहरु दिवश ढुङ्गेल, मानबहादुर पौडेल, युवराज पौडेल ( सूनपा) लगायत ८४ जना स्थानीय उपभोक्ताहरूको सहयोगमा जुटेको १,१०,००० रुपैयाँ रकमबाट उक्त निर्माण कार्य सम्भव भएको श्री शिव माई माध्यमिक विद्यालय नयाँ बजारका विद्यालय व्यवस्थापन समिति अध्यक्ष एवं स्थानीय उपभोक्ता प्रकाश ढुङ्गेलले बताउनु भयो ।
उहाँका अनुसार श्रमदान र स्थानीय सहयोगी मनहरूका कारण सडक निर्माण भएसँगै अब गाउँलेहरूलाई आवतजावतमा ठूलो राहत पुगेको छ । उहाँले भन्नु भयो ‘ एकलाख साठी हजार रकमबाट ३ किलोमिटर बाटो बन्न सम्भव थिएनन तर जागरुक स्थानीय जनताको श्रमदानले नै यसलाई संभव बनाएको हो।
