काठमाण्डौ – नेपाली कांग्रेसका नेता रामचन्द्र पौडेल नेतृत्वको पाँच दलीय चुनावी संयन्त्रको बैठकले स्थानीय तह निर्वाचनमा सत्तारुढ गठबन्धन दलहरुबीच तालमेलको खाका तयार पार्ने जिम्मा शीर्ष नेताहरुलाई दिने निर्णय गरेको छ ।

पाँच दलीय गठबन्धनको निर्वाचन तयारी तथा अनुगमन समितिको बैठक आइतबार बसेको हो । प्रधानमन्त्री निवास बालुवाटारमा बसेको समितिको बैठकले स्थानीय तहबाट आएका सुझावमा छलफल गर्दै ती सुझाव र प्रतिवेदन शीर्ष तहको बैठकमा पेश गर्ने निर्णय गरेको हो ।

‘बैठकले स्थानीय निर्वाचनमा गठबन्धनलाई कसरी प्रभावकारी अघि बढाउने भन्ने विषयमा गम्भीर छलफल ग¥यो । अब सोमबार शीर्ष तहमा छलफल गरेर ठोस निश्कर्षमा पुग्नेछौ,’ सञ्चारमन्त्रीसमेत रहेका काँग्रेस नेता ज्ञानेन्द्रबहादुर कार्कीले भनेका छन् । अधिकांश स्थानीय तहबाट निर्वाचनमा तालमेलसम्बन्धी प्रतिवेदन आएको जानकारी पनि उनले दिए । यसअघि बसेको समितिको बैठकले स्थानीय तहमा तालमेलको विषयलाई लिएर प्रतिवेदन बुझाउन चैत २६ गतेसम्मको समयसीता तोकेको थियो ।

सरकारमा रहेको पाँच दलले स्थानीय निर्वाचनमा गठबन्धन कायम राख्न काँग्रेस नेता रामचन्द्र पौडेलको नेतृत्वमा समिति बनाएको थियो । समितिको सदस्यमा कांग्रेसबाट महामन्त्री गगन थापा र सञ्चारमन्त्री ज्ञानेन्द्र कार्की सदस्य छन् । यसैगरी नेकपा माओवादी केन्द्रबाट नेता वर्षमान पुन र देवप्रसाद गुरुङ, एकीकृत समाजवादीबाट वेदुराम भुसाल र विजय पौडेल, जसपाबाट अशोक राई र रेणु यादव तथा राष्ट्रिय जनमोर्चाबाट हिमाल पुरी रहेका छन् ।