काठमाडौ,गैरआवासीय नेपाली संघ एनआरएनएले आफ्नो संरचनात्मक सक्रियता र प्रभावकारिता विस्तार गर्ने क्रममा जिम्मेवारी बाडफाड गरेको छ । संघको कल्याण विभाग प्रमुखमा उपाध्यक्ष रोजिना प्रधान राई चयन भएसँगै विदेशमा रहेका नेपालीहरूको हक, हित र अधिकारका मुद्दाहरू थप सशक्त ढंगले उठ्ने अपेक्षा गरिएको छ।
नवनियुक्त विभाग प्रमुख राईले आफ्नो जिम्मेवारीलाई केवल औपचारिक पदको रूपमा नभई, विश्वभर फैलिएका नेपाली समुदायको प्रतिनिधित्व गर्ने गम्भीर दायित्वका रूपमा लिएको बताएकी छन्। उनले विदेशमा रहेका नेपालीहरूको जीवनसँग प्रत्यक्ष जोडिएका समस्या समाधानलाई प्राथमिकतामा राख्ने स्पष्ट संकेत दिएकी छन्।
उनले विशेषगरी नेपाली नागरिकताको निरन्तरता, गोर्खा सैनिक तथा तिनका परिवारको सामाजिक आर्थिक सुरक्षा, र विभिन्न देशमा रहेका नेपालीहरूको अधिकार संरक्षणलाई प्रमुख कार्यसूचीमा राखेकी छन्। साथै, वैदेशिक भूमिमा विभिन्न कारणले समस्या भोगिरहेका नेपालीहरूका लागि कानुनी तथा प्रशासनिक सहयोग प्रणालीलाई व्यवस्थित र प्रभावकारी बनाउनेतर्फ पनि विभागले काम गर्ने उनको योजना छ।
राईका अनुसार, अहिलेको आवश्यकता केवल घोषणामूलक कार्यक्रम होइन, परिणाममुखी हस्तक्षेप हो। त्यसका लागि उनले विश्वभर रहेका नेपाली संघ–संस्था, क्षेत्रीय संयोजकहरू तथा सम्बन्धित निकायहरूसँग सहकार्य गर्दै साझा रणनीति निर्माण गर्ने बताएकी छन्। “नेपालीका लागि, नेपालीद्वारा” भन्ने मूल नारालाई व्यवहारमा रूपान्तरण गर्दै वास्तविक सेवा प्रवाहमा केन्द्रित हुने उनको प्रतिबद्धता छ।
यो नियुक्तिले एनआरएनए भित्रको संस्थागत गतिशीलतालाई नयाँ दिशा दिने संकेत गरेको छ। विशेषगरी पछिल्लो समय उठिरहेका डायस्पोरा सम्बन्धी विविध मुद्दाहरू जसमा कानुनी जटिलता, नागरिकता समस्या, सामाजिक सुरक्षा अभाव लगायतका विषयहरूलाई सम्बोधन गर्न अब कल्याण विभागको भूमिका निर्णायक बन्ने देखिन्छ।

तिन पुस्ता भन्दा अगाडीका नेपाली खासगरि बर्मा,थाइल्याण्ड, म्यान्मार, मलेशियामा रहेका नेपाली मुलका नेपाली (पिएनओ) लाई नेपालसङ्ग वैधानिक रूपमा जोड़ने काममा बिशेस भूमिका खेल्ने रोजिनाले बताईन ।